這是《上下游副刊》刊登的第一首台語詩，在烏暗的頭城農場，參加「建蓁自然書寫文學營」的眾人摸黑尋覓螢火蟲……當黃佳韡以韻味十足的優美台語當場朗誦出來時，全場屏氣凝神，眾位講師毫無異議地將這首詩選為文學營的佳作。
（看不懂台語文也沒關係，文末有作者黃佳韡的朗讀呦！）
下暗文學營的老師𤆬逐家出野外看火金蛄。
逐家頭向向踮草埔仔, 揣火金蛄的幼蟲, 老師講毋通看貓的無點, 火金蛄仔囝細罔細, 卻是厲害的腳數, 會哺露螺, 準算是仝沿的嘛照常捽了了。
伊的尻川火爍一下爍一下, 毋驚鳥隻抑是蟲豸發現, 因為伊誠臭閣誠歹食。火金蛄仔囝足克虧, 逐隻攏是孤兒, 猶未出世阿爸阿母就已經死去矣。咱台灣這馬時行復育火金蛄, 自南到北, 這途的生理做甲不止仔大。
揜貼的深林內袂有火金蛄, 顛倒是路邊溝仔, 抑是小山坪有爛葉的湳地較濟。火金蛄的尻川火是用來求拍種的, 所致, 火愈光愈旺, 就會當吸引母蟲的意愛。
咱敢會使掠足濟火金蛄, 囥佇紗橐仔內底用來炤路咧？根據專家講, 是會使啦, 不而過, 一擺至少愛掠500隻以上。全世界有2000外種火金蛄。咱台灣有62種, 干焦3種是水生的。
火金蛄敢干焦用來予人看媠的？毋著, 火金蛄是重要的生態指標。凡勢若有一工, 火金蛄無法度生存, 咱人嘛活袂落去矣。
我是惡人無膽, 平常時仔駡阮翁婿誠聳勢, 毋過, 行佇暗挲挲的野外, 是驚甲咇咇掣, 共阮翁的手搝牢牢, 袂輸當當年踮校園內, 頭擺牽手時的難分難捨。誠歡喜有這个機會, 綴一陣人暗暝出來賴賴趖, 走揣火金蛄。
向望火金蛄一直共咱炤路, 生命的生湠無定著是莫名其妙的, 毋過, 所有的生命, 咱攏總鬥陣活落去, 就的確有意義。